فه‌رید ئه‌سه‌سه‌رد‌
بژاردە سەختەكانی پاش ریفراندۆم ‌
 مام جەلال
یه‌كه‌مین وتاری مام جه‌لال له‌ شۆڕشی نوێدا ‌
 مه‌لا به‌ختیار‌
ریفرانـدۆم‌و كـاردانەوەی دژە دیموكراسی! ‌
 عەتا كەریم
سێرچی بەدیل بۆ ریفراندۆم ‌
 ستران عەبدوڵڵا
نه‌ته‌وه‌یه‌ك له‌سه‌ر كاغه‌زه‌وه‌ بۆ سه‌ر ئه‌رز ‌
 فه‌رید ئه‌سه‌سه‌رد‌
كەركوك لەجەنجاڵی ریفراندۆم ‌و ئەگەرە سەختەكاندا
 فه‌رید ئه‌سه‌سه‌رد‌
ریفراندۆم ‌و پلانیB
 خالد مەجید فەرەج
یاسای هەڵبژاردنی نوێ لەبەرژەوەندی حیزبو کیانە بچکۆلەکاندا نیە
 د.به‌ختیار جەبار شاوه‌یس‌
هەڵبژاردنەكانی ئایندە و بەرپرسیارێتی پەرلەمانی عیراق ‌
 ستران عەبدوڵڵا
خه‌لافه‌ت لای گراهام فۆله‌ر ‌
 خالد مەجید فەرەج
قسەیەک لەسەر هەڵبژرادنەکانی عێراق
 شۆڕش ئیسماعیل
یادێکی مەزن.....
 خالد مەجید فەرەج
هه‌ڵبژاردنه‌کانی سه‌رۆکایه‌تی ئێران
 خالد مەجید فەرەج
وانه‌یه‌ک له‌ هه‌ڵبژاردنه‌کانی فه‌ره‌نساوه‌
 فه‌رید ئه‌سه‌سه‌رد‌
ریفراندۆمی یاسایی بەبێ ریفراندۆم نابێ ‌
 له‌شكر حه‌مه‌ ساڵح‌‌
هه‌ڵبژاردنی داهاتوو دواده‌خرێت! ‌
 سۆران علی‌
بۆچی پارتی بیر له‌ بایكۆتی هه‌ڵبژاردن ده‌كاته‌وه‌؟
 مه‌لا به‌ختیار‌
هه‌ڵبژاردنی‌ ترامپ‌و دوا هه‌لی به‌رده‌م كورد ‌
 کوردستانی نوێ‌
دینامیكیه‌تی كورسی حوكم ‌
 جەمال ئارێز
دیالۆگی دوربەدور ‌
مه‌لا به‌ختیار‌

11/15/2016 12:28:57 PM

هه‌ڵبژاردنی‌ دۆنالد ترامپ، به‌وشێوه‌یه‌ی‌ كه‌ پێچه‌وانه‌ی‌ زۆربه‌ی‌ بۆچونه‌كان‌و راپرسیه‌كان، بردیه‌وه‌، هه‌تا ئێستا، ته‌واوی‌ جیهان‌و رۆژنامه‌و لێكۆڵه‌ره‌وان، هۆیه‌كانی‌ بنه‌ما ئابوریی‌و هاوكێشه‌ سیاسیه‌كان، كه‌ ترامپیزمی‌ هێنایه‌به‌رهه‌م، لێكده‌ده‌نه‌وه‌.
به‌ده‌ر له‌ ژماره‌‌و ئامارو گوتاری‌ پێچه‌وانه‌كان، به‌ده‌ر له‌وه‌ی‌ دیموكراته‌كان به‌سه‌رۆكه‌وه‌ هه‌تا دوا سه‌ركرده‌یان كه‌وتنه‌ كار بۆ ده‌رچواندنی‌ خانم كلنتن، ده‌بێ به‌دیوی‌ ده‌رونشیكاری‌ سۆسیۆلۆژی‌‌و كۆتاییهاتنی‌ گه‌مه‌كانی‌ ئاراسته‌ی‌ دیموكرات‌و كۆمارییه‌كان، یان چه‌پ‌و راسته‌كان، هیچ نه‌بێ ده‌رهه‌ق به‌م هه‌لومه‌رجه‌، لێكبدرێته‌وه‌.


بۆ یه‌كه‌مین جاریش نییه‌، سه‌ركرده‌یه‌كی‌ پۆپۆلستی‌، به‌ده‌ر له‌ بۆچونی‌ حزبه‌كه‌ی‌‌و رێسای‌ سیاسه‌تی‌ وڵاته‌كه‌ی‌، ده‌توانێت توندو نه‌رم، به‌ هه‌ڕه‌شه‌و به‌ڵێن، دۆخی‌ كۆمه‌ڵایه‌تی‌‌و ئاڵۆزیی‌ سیاسی‌‌و دڵه‌راوكێ له‌ دوژمنه‌كان، به‌تایبه‌تی‌ تیرۆریستان، هه‌ل بقۆزێته‌وه‌. ته‌نها ئه‌وه‌ش سه‌یر نییه‌، ترامپ له‌ دیموكراته‌كانی‌ بردۆته‌وه‌. ئه‌ویش به‌ بردنه‌وه‌ی‌ ده‌نگه‌ گه‌وره‌كانی‌ ویلایه‌ته‌كان، نه‌ك به‌رێژه‌ی‌ ده‌نگه‌كان. هیلاری‌ كلنتن (59.4 ملیۆن ده‌نگ)و له‌به‌رامبه‌ریشدا ترامپ (59.2 ملیۆن ده‌نگ)ی هێناوه‌. له‌ ده‌نگه‌ گه‌وره‌كاندا ترامپ (300 ده‌نگ)ی‌ تێپه‌ڕاند، ئه‌مه‌ له‌كاتێكدا به‌ (270 ده‌نگ)یش ده‌یبرده‌وه‌. كه‌وابێ، نیوه‌ی‌ ده‌نگده‌رانی‌ ئه‌مریكا، له‌ناخیاندا بیركردنه‌وه‌كانی‌ جارانیان به‌رامبه‌ر به‌دیموكرات‌و دیموكراته‌كان گۆڕابو.


ترامپ، ئاشكرا هه‌ستی‌ ژنانی‌ بریندار ده‌كرد، كه‌چی‌ 42%ی‌ ژنان ده‌نگیان دایه‌. كه‌وابێ ژن به‌ده‌ر له‌ جیاوازیی ره‌گه‌زایه‌تی‌، له‌و وڵاته‌دا ده‌نگی‌ داوه‌. هه‌روه‌ها ئاماره‌كان پێمانده‌ڵێن، سه‌ره‌نجامی‌ سه‌رهه‌ڵدانی‌ تیرۆرو سه‌له‌فیه‌ت، یه‌كه‌مینجاره‌ له‌مێژووی‌ ئه‌مریكادا 62%ی‌ سپی‌ پێسته‌كان، هاوهه‌ست بوون به‌رامبه‌ر چاره‌نوسی‌ خۆیان له‌ ئه‌مریكا، بۆیه‌ له‌ده‌وری‌ تێزه‌كانی‌ راست، ئاڵان. ئه‌مه‌ش رێژه‌یه‌كی‌ زۆری‌ ده‌نگده‌رانی‌ ترامپ بوو.


ترس‌و بیم له‌ تیرۆرو له‌ ئیسلامی‌ سیاسی‌‌و له‌ بێگانه‌، كاریگه‌ری‌ سۆسیۆ-سایكۆلۆژی‌ قوڵی‌ هه‌بوو له‌سه‌ر بڕیاری‌ ده‌نگده‌ر. دیاره‌ ترامپ‌و تیمه‌كه‌ی‌ له‌ هه‌ڵبژاردندا، ئه‌م باره‌ سایكۆلۆژییه‌ی‌ رای‌ گشتییان، ورد خوێندبۆوه‌. ئه‌مه‌ له‌كاتێكدا دیموكراته‌كان، به‌هه‌مان پێوه‌ره‌كانی‌ هه‌ڵبژاردنی‌ رابردوو، كه‌وتنه‌ ململانێ. ئه‌مه‌ش مه‌ترسییه‌كی‌ گه‌وره‌یه‌ له‌سه‌ر خوێندنه‌وه‌ی‌ فه‌لسه‌فه‌ی‌ هه‌ڵبژاردن.
له‌ فه‌لسه‌فه‌ی‌ هه‌ڵبژاردندا، كوشنده‌یه‌ ته‌نها پشت به‌ مێژووی‌ خه‌بات‌و ده‌ستكه‌وت، ببه‌سترێت. كوشنده‌تریشه‌ پشت به‌ كاریزماو سه‌ركردایه‌تی‌ به‌ئه‌زمون ببه‌سترێت، به‌ڵكو هه‌موو هه‌ڵبژاردنێك هه‌لومه‌رجی‌ ئابوری‌‌و سیاسی‌‌و سۆسیۆ- سایكۆلۆژی‌ خۆی‌ هه‌یه‌. هه‌ر حزبێك به‌وردی‌ جومگه‌ تایبه‌تمه‌ندیه‌كانی‌ هه‌موو هه‌ڵبژاردنێك نه‌خوێنێته‌وه‌، مه‌ترسی‌ له‌سه‌ره‌. مێژوو پڕه‌ له‌م جۆره‌ مه‌ترسییانه‌. نه‌ك هێزی‌ پۆپۆلیستی‌، به‌ڵكو هێزی‌ فاشستی‌‌و نازیش توانیویانه‌ خوێندنه‌وه‌ی‌ هه‌ڵه‌ی‌ هێزه‌ چه‌پ‌و دیموكراته‌كان بقۆزنه‌وه‌. زۆرجاریش ئاستی‌ نزمی‌ سه‌ركرده‌كان، له‌خوێندنه‌وه‌ی‌ هاوكێشه‌كان‌و هه‌ست‌و هه‌ڵوێستی‌ خه‌ڵك‌و چۆنێتی‌ داڕشتنی‌ پرۆژه‌كان‌و دیاریكردنی‌ كاندیده‌كان، شكستی‌ گه‌وره‌یان لێكه‌وتۆته‌وه‌.


ترامپ‌و تیمه‌كه‌ی‌، نه‌ك باشتر له‌ دیموكراته‌كان، ئه‌و جومگانه‌یان خوێنده‌وه‌، به‌ڵكو باشتر له‌ زۆربه‌ی‌ حزبه‌كه‌ی‌ خۆیشیان، له‌ هه‌لومه‌رجی‌ ئه‌م هه‌ڵبژاردنه‌ی‌ ئه‌مریكا، قوڵ بوبونه‌وه‌. ئه‌گه‌رنا، ترامپی‌ كاندیدی‌ كۆماریه‌كان، خاوه‌ن رێبازی‌ ئایدیۆلۆژی‌ نیه‌، پێشینه‌ی‌ سیاسه‌تی‌ نه‌بووه‌؛ هه‌تا ساڵی‌ 1987 یه‌كه‌مین جار له‌ حزبی‌ دیموكراتدا تێكۆشیوه‌؛ له‌وه‌به‌دوا هه‌تا ساڵی‌ 1999 ده‌بێته‌ كۆماری‌؛ دوای‌ ئه‌وه‌ هه‌تا ساڵی‌ 2001 ده‌بێته‌ ریفۆرمستی‌؛ له‌مه‌به‌دواشه‌وه‌ هه‌تا 2009 ده‌بێته‌وه‌ به‌ دیموكرات؛ له‌م ساڵانه‌ی‌ دواییشدا بۆته‌وه‌ به‌ كۆماری‌. كه‌سایه‌تیه‌كی‌ ئاوها، كه‌ ئایدیۆلۆژیه‌تی‌ نه‌بێ، له‌ (22 ساڵ)دا (5 جار) سه‌نگه‌ری‌ گواستبێته‌وه‌. له‌پڕ وه‌كو ته‌كنۆكراتێك، خۆی‌ كاندید ده‌كات‌و له‌ناو حزبه‌كه‌ی‌ خۆیدا ده‌یباته‌وه‌و دیموكراته‌كان‌و خانم كلنتنیش ده‌به‌زێنێ. ئه‌مه‌ جگه‌ له‌ خوێندنه‌وه‌ی‌ وردی‌ سایكۆلۆژیه‌تی‌ جه‌ماوه‌ر، له‌ هه‌لومه‌رجی‌ ئێستای‌ ئه‌مریكاو جیهان، هیچی‌ تر ناگه‌یه‌نێت.


پرسیار ئه‌وه‌یه‌، ئایا ترامپ‌و تیمه‌كه‌ی‌‌و رێبازو هه‌ژمونه‌كه‌ی‌، ته‌نها له‌چوارچێوه‌ی‌ ئه‌مریكادا ده‌مێننه‌وه‌؟ یان ته‌واوی‌ رۆژئاوا ده‌ته‌ننه‌وه‌؟
له‌وه‌ڵامدا، ده‌بێ بڵێین كه‌ ژینگه‌ی‌ سیاسی‌‌و رای‌ گشتی‌ رۆژئاوا سه‌راپا، كه‌وتونه‌ته‌ ژێر سامی‌ مه‌ترسیه‌كانی‌ تیرۆره‌وه‌. واتا دۆخی‌ سیاسییان لێكده‌چێ. له‌دوای‌ جه‌نگی‌ دووه‌می‌ جیهانه‌وه‌، هه‌رگیز رێبازی‌ راستی‌ رۆژئاوا، هێنده‌ی‌ ئێستا، پروپاگه‌نده‌كانیان له‌ناو رای‌ گشتی‌، گوێلێگیراو نه‌بووه‌. له‌به‌رامبه‌ریشدا، چه‌پ‌و دیموكرات-چه‌په‌كانی‌ ئۆروپاش، هێنده‌ی‌ ئێستا، نه‌كه‌وتونه‌ته‌ ته‌نگژه‌و بیمی‌ چاره‌نوس.


به‌ده‌ر له‌وه‌ی‌ ئه‌م جۆره‌ هه‌ڵبژاردن‌و سه‌ره‌نجامانه‌، له‌سه‌ره‌تاوه‌، هه‌ڵڵاو بگره‌ ده‌وروژێنن، هه‌تا ئه‌وه‌نده‌ی‌ سه‌رۆك‌و تیمه‌كه‌ی‌، حكومه‌ت داده‌مه‌زرێنن. ده‌كه‌ونه‌ پیاچونه‌وه‌ به‌ سیاسه‌تی‌ حكومه‌تی‌ پێشوو. بڕیارو به‌رنامه‌كانیان ده‌به‌نه‌ كۆنگرێس‌و ئه‌نجومه‌نی‌ سه‌نا. رێكه‌وتنی‌ نوێ، مۆر ده‌كه‌ن. دوای‌ ئه‌مه‌، گۆمه‌ شڵه‌قاوه‌كه‌ی‌ هه‌ڵبژاردن‌و ململانێكان، بن ده‌نێنه‌وه‌. ئیدی‌، به‌رژه‌وه‌ندی‌ ئابوری‌ (نه‌ك پروپاگه‌نده‌ی‌ هه‌ڵبژاردن) كاریگه‌ری‌ چاره‌نوسسازیان له‌سه‌ر ئه‌م جۆره‌ حكومه‌تانه‌ش ده‌بێ. مێژوو پڕه‌ له‌ ئه‌زمونی‌ گڕگرتنی‌ هه‌ڵبژاردن‌و بیانوگرتنی‌ ئایدیۆلۆژی‌‌و گڕوێی‌ هه‌ڵوێست فرۆشتن. به‌ڵام له‌دوائه‌نجامدا، له‌سیاسه‌تدا، نه‌ رقی‌ هه‌تا سه‌ر هه‌یه‌و، نه‌ خۆشه‌ویستی‌ هه‌تا كۆتایی‌. رق، كۆتایی‌ دێت‌و ده‌بێته‌ خۆشه‌ویستی‌، خۆشه‌ویستیش بۆی‌ هه‌یه‌ كۆتایی بێت‌و ببێته‌ رق. ئه‌وه‌ی‌ كۆتایی‌ نایه‌ت، ته‌نها به‌رژه‌وه‌ندی‌ ئابورییه‌. ئه‌وه‌ به‌رژه‌وه‌ندی‌ ئابورییه‌، له‌و سنوره‌ی‌ زۆرترین قازانج ده‌كات، دیسان رێگایه‌كی‌ تر ده‌گرێته‌وه‌ به‌ر، بۆئه‌وه‌ی‌ زۆرترین قازانجی‌ تر بكات. ترامپیش، له‌م گه‌مه‌یه‌ به‌ده‌ر نابێ. له‌دوائه‌نجامدا، ئه‌مریكاییه‌كان چاوه‌ڕوانن، ترامپ باری‌ ئابورییان چاك بكاته‌وه‌. په‌یوه‌ندی‌ ئابوری‌ ئه‌مریكاو دنیا پێش بخات. رێژه‌ی‌ بێكاری‌ كه‌مبكاته‌وه‌. مه‌ترسییه‌كان له‌سه‌ر ئه‌مریكا، دوربخاته‌وه‌. ته‌نانه‌ت ئه‌گه‌ر بیه‌وێ، كۆچبه‌ری‌ نایاساییش له‌وڵاته‌كه‌ی‌ دورخاته‌وه‌، ئه‌مه‌ش به‌بێ ئابورییه‌كی‌ به‌هێز، مه‌حاڵه‌. خۆ ئه‌گه‌ر بیشیه‌وێ بیمه‌ی‌ سیسته‌می‌ ته‌ندروستی‌، بگۆڕێ، ئه‌مه‌یان به‌بێ به‌رزكردنه‌وه‌ی‌ ئاستی‌ بژێوی‌ خه‌ڵك، مه‌حاڵ مه‌حاڵه‌. هه‌موو رێگاكان، ده‌گه‌ڕێنه‌وه‌، بۆ ژێرخانی‌ ئابوری‌. ئه‌ویش ئابوری‌ ئه‌م سه‌رده‌مه‌، نه‌ك فه‌لسه‌فه‌ی‌ ئابوری‌ دیكنز‌و فه‌یله‌سوفه‌ كلاسیكیه‌كانی‌ ئابوری.


ئه‌وه‌ی‌ ده‌بێت وردتر له‌ په‌یوه‌ندی‌ ئه‌مریكاو جه‌مسه‌ره‌ سیاسی‌‌و ئابوریه‌كانی‌ تری‌ جیهان، گه‌لانی‌ وه‌كو كورد، لێكیبده‌ینه‌وه‌، سیاسه‌تی‌ ترامپه‌ به‌رامبه‌ر كێشه‌ كۆمه‌ڵایه‌تی‌ سیاسی‌‌و دیموكراسیه‌كانی‌ جیهانی‌ بێ دیموكراسی‌. تێزی‌ ترامپ، به‌گشتی‌ تێزی‌ سه‌ركرده‌و ده‌وڵه‌تی‌ به‌هێزه‌. تێزی‌ به‌هێزكردنی‌ ده‌وڵه‌ت‌و به‌كارهێنانیه‌تی‌ بۆ سه‌پاندنی‌ سیاسه‌تی‌ به‌هێز (ئه‌گه‌ر به‌رژه‌وه‌ندی‌ ئابوری‌ پێی نه‌گۆڕێت). ئه‌م جۆره‌ تێزه‌، مه‌خابن، له‌گه‌ڵ ستراتیژی‌ چاره‌سه‌ری‌ دیموكراسی‌، یان ستراتیژی‌ خستنه‌گه‌ڕی‌ هێزه‌ نه‌رمه‌كانی‌ وڵاتانی‌ له‌مه‌ڕ كوردستان، یه‌كناگرێته‌وه‌. ئه‌گه‌ر بێت‌و ترامپ به‌دوای‌ سه‌ركرده‌ هاوتاكانی‌ خۆی‌ له‌وڵاتانی‌ عه‌ره‌بی‌، یان له‌رۆژهه‌ڵاتی‌ ناوه‌ڕاستدا بگه‌ڕێت، هه‌روه‌كو خۆی‌ وتویه‌تی‌ سه‌رۆكی‌ سوریام پێگرنگه‌ بۆ دوژمنایه‌تی‌ داعش، كه‌وابێ سه‌رۆكه‌كانی‌ ئێستای‌ ناوچه‌كه‌، به‌تایبه‌تی‌ سوریا، توركیا، میسر، سعودیه‌، له‌سه‌رۆكه‌ پارێزراوه‌كان ده‌بن.


خوێندنه‌وه‌ سه‌ره‌تاییه‌كان پێمانده‌ڵێن: ئه‌مریكای‌ دوای‌ ترامپ، ئێران له‌ده‌ره‌وه‌ی‌ بازنه‌ی‌ سیاسه‌تی‌ جیهانیی‌ ئه‌مریكایه‌. ئه‌میش ره‌ها نییه‌، بۆی‌ هه‌یه‌ بگۆڕێ. واتا: سه‌رۆك‌و سه‌ركرده‌كانی‌ ده‌وڵه‌تانی‌ ئێستای‌ كه‌ هه‌ن، له‌به‌رامبه‌ر سیاسه‌تی‌ ترامپ‌و تیمه‌كه‌یدا، هه‌موویان قابیلی‌ ئه‌وه‌ن رێكبكه‌ون، یان ناكۆكیه‌كانیان كه‌م بكه‌نه‌وه‌. یاخود گریمان ترامپ بتوانێ بڕیاری‌ توند به‌رامبه‌ر به‌هه‌ر ده‌وڵه‌تێكی‌ ئیقلیمی‌، بدات. له‌به‌رامبه‌ردا ئه‌م ده‌وڵه‌تانه‌ش ده‌توانن له‌سه‌ر نه‌خشه‌ی‌ سیاسی‌ جیهاندا، پشتیوانی‌ ئابوری‌‌و سیاسی‌، دابین بكه‌ن، هه‌تاراده‌یه‌ك به‌ره‌نگارییش بكه‌ن. دووریش نییه‌ هاوكێشه‌كانیش بگۆڕن. چونكه‌ دنیای‌ تاك جه‌مسه‌ری‌ نه‌ماوه‌. دنیای‌ دوو جه‌مسه‌ریش نه‌ماوه‌. دنیای‌ فره‌جه‌مسه‌ری‌ هه‌یه‌و له‌ناو هه‌موو جه‌مسه‌رێكیشدا لوتكه‌ی‌ سیاسی‌‌و ئابوری‌‌و بازاڕی‌ جیاواز جیاوازیش، هه‌یه‌. به‌ڵام گه‌لانی‌ ئازادیخوازی‌ وه‌كو كورد، له‌به‌رامبه‌ر ئه‌م دۆخه‌دا، له‌ناو ته‌واوی‌ جه‌مسه‌ره‌كاندا، به‌ده‌وڵه‌تانی‌ ئیقلیمیشه‌وه‌، چ ده‌سته‌به‌رێكی‌ ستراتیژیمان هه‌یه‌؟ تاقه‌ ده‌سته‌به‌ر كه‌ به‌ده‌ستی‌ خۆمانه‌و ده‌توانین به‌دیبێنین، چاره‌سه‌ركردنی‌ كێشه‌ ناوخۆییه‌كانمانه‌. ئه‌ویش ئه‌م نانه‌ به‌و رۆنه‌ی‌ پێده‌كه‌ین.


كاتێكی‌ زۆرمان له‌ده‌ستداوه‌. پێموایه‌ له‌مه‌ودوا كات زیاتر فشارمان بۆ ده‌هێنێت. موسڵ‌و ره‌ققه‌ش بونه‌ته‌ چه‌قی‌ چاره‌نوس. دوای‌ موسڵ‌و ره‌ققه‌، به‌ره‌و كوێ؟ له‌وه‌ده‌چێ، هه‌ندێك له‌ هاوكێشه‌كان‌و ناوه‌نده‌كانی‌ بڕیاری‌ سیاسی‌، له‌ده‌وروبه‌رماندا، ئاڵوگۆڕیان به‌سه‌ردا بێت. هه‌رچه‌ند سه‌یری‌ ئاسۆی‌ رووداوه‌كان ده‌كه‌ین، نابینین شیعه‌و سوننه‌، وه‌كو پرۆتستان‌و كاسۆلیكی‌ سه‌ده‌ی‌ هه‌ژده‌هه‌می‌ رۆژئاوا، رێكه‌وتنێكی‌ مێژوویی‌ له‌نێو خۆیاندا تۆمار بكه‌ن. ناشبینین ئه‌م ده‌وڵه‌تانه‌ی‌ هه‌ن، لایه‌نی‌ كه‌می‌ توانای‌ چاره‌سه‌ركردنی‌ كێشه‌ ئیقلیمیه‌كانیان هه‌بێ. به‌ڵام ده‌وڵه‌ته‌ گه‌وره‌كان، پێویستییان به‌هه‌موو ئه‌م ده‌وڵه‌تانه‌ هه‌یه‌. دوای‌ شه‌ڕی‌ داعش كه‌متر پێویستیان به‌توانای‌ جه‌نگینی‌ كورد ده‌مێنێت. ئه‌گه‌ر هێزه‌ سیاسیه‌ كوردستانیه‌كان، ئه‌م بارو بواره‌ی‌ ماوه‌ له‌به‌رده‌ستمان، له‌خۆمان نه‌بوێرین، بۆ چاره‌سه‌ركردنی‌ كێشه‌كان، بێگومان له‌هه‌ر چوار به‌شه‌كه‌ی‌ كوردستان، هه‌رلایه‌ك به‌رده‌وام بێت خۆی‌ له‌ چاره‌سه‌ر بدزێته‌وه‌، یان روداوه‌كان خراپ بخوێنێته‌وه‌، هێزی‌ ئاوها، یان خۆی‌ هه‌ڵگرتوه‌ له‌گه‌ڵ جه‌مسه‌رێك یان چه‌ند جه‌مسه‌رێكی‌ ناوچه‌كه‌، هاوبه‌رژه‌وه‌ند بێت. یان ده‌بێته‌ مایه‌ی‌ شكستی‌ گه‌وره‌ی‌ ئه‌زمون‌و خه‌باته‌كه‌مان. بیریشمان بێ، كورد به‌ په‌رش‌وبڵاویی‌، له‌هه‌ر به‌شێكی‌ كوردستاندا، بیه‌وێ خۆی‌ به‌هه‌ر لایه‌كدا هه‌ڵواسێ، له‌حاڵه‌تی‌ واشدا، ئه‌و لایه‌نه‌ یان ئه‌و لایه‌نانه‌، ده‌بن به‌ كۆیله‌ی‌ بڕیاره‌ ئیقلیمیه‌كان‌و ده‌كه‌ونه‌ ناو مه‌نگه‌نه‌ی‌ ناكۆكیه‌كان.
دوای‌ ده‌رچونی‌ ترامپ‌و ره‌هه‌نده‌كانی‌ سیاسه‌ته‌كانی‌، هه‌لێكی‌ تر هه‌ڵده‌كه‌وێ، كورد له‌نێوان خۆیدا رێكبكه‌وێت. ئومێده‌وارین ئه‌م هه‌له‌ش وه‌كو هه‌له‌كانی‌ تر له‌ده‌ستنه‌درێت. ته‌نگژه‌ی‌ ئابوریش نه‌كرێته‌ بیانو بۆ هه‌ڵه‌ی‌ مێژوویی‌. راسته‌ شاده‌ماری‌ چاره‌سه‌ره‌ ئابوری‌‌و سیاسی‌‌و ده‌ستوریه‌كان له‌ به‌غدایه‌، راستیشه‌ له‌مه‌وبه‌ر هه‌ڵه‌ كراوه‌ له‌ زوو جێبه‌جێكردنی‌ ئه‌م چاره‌سه‌ره‌، دیاره‌ هه‌ڵه‌ قابیلی‌ چاره‌سه‌ره‌. به‌ڵام هه‌ڵدێر هه‌موو ده‌ستكه‌وته‌كانمان له‌ده‌ست ده‌دات. تێكدانی‌ یه‌كگرتویی‌ هه‌رێمی‌ كوردستان، ئه‌گه‌ر نه‌شچێته‌ خانه‌ی‌ خیانه‌تی‌ نه‌ته‌وه‌یی‌، ده‌چێته‌ خزمه‌تی‌ خیانه‌تی‌ نه‌ته‌وه‌ییه‌وه‌.


11/15/2016 12:28:57 PM Read Count [576] Big Font Small Font

بیروڕاکان


بیروڕای‌ خوت بنێره‌
ناو :  
ئیمه‌یڵ :    
کۆمێنت :  
   

ریفرانـدۆم‌و كـاردانەوەی دژە دیموكراسی! ‌ 10/2/2017 9:28:03 AM 23

  1   

له‌ په‌ڕه‌ی 1 له‌ 1 ( 1 وتار )